Category Archives: Arsip Sasak

Puisi Sasak: aix ngembux lex gumi paer

Gupran Muhsan

Gupran Muhsan

Oleh Gupran Muhsan

lex bawax lolon kayux sax belex
ngembux ngempul nyempual
nyereng meneng begeleneng
ngelex jox tanax gero sax panas leteng

syukur rase ate angen
panas leteng gumi paer jeri senep adem
aix ngembux miax tetanduran tiwox
besuli bekembang bebuax sampai maux terasax…

aix ngembux lex gumi paer
sayan sue sayan kurang ngelex geleneng
te tipes te bates te tembox te gembox
sayan sue sayan susah te sedox

aix ngembux wah jerax ngelex
aix ngembux demen tebentex
aix ngembux wah tame gegandex
aix ngembux wah luex bejulux beserex

luex ite mete aix ngembux
timax te tembox te gembox te julux
ite tetep saling julux mele maux
sanggup lampax timax jaox

aix ngembux umpame ilmu
ilmu sax perlu dait mekadu
lamun bau ndax bae tuker six kepeng siyu

alur ne ngelex geleneng tipax sax panas leteng
aget ne irup tiwox leloloan
miax aix ngembux baru lex gumi lendang
jeri manfaat tipax ite selapuan

Puisi Sasak : Apa Aku Ini Lombok?

Oleh. Gupran Muhsan

apa aku ini lombok…..?
lantas bicaraku bahasa lombok…..!
ataukah lombokku bengkok…..?
lalu sering bahasaku di olok…..?

apa dan siapapun aku….
inilah bicaraku dan ucapanku…..

TODOQ KU TE BUNGKEM
MATANGKU TEPEGITAQ….
ISIQ DENGANN SAQ NYUNGSAQ……
ISIQ DENGAN SAQ NYIKSAQ……
ISIQ DENGAN SAQ KEPUSAQ….

SAI SINO NYUNGSAQ…..
SAI SINO NYIKSAQ…..
SAI SINO KEPUSAQ….
SAI SINO SAQ TEPESILAQ…..

DUNIE JEBOLAQ KEBALEQ…..
ONGKAT ITE PADE NGERAOSSSS…
LAEQ SAQ NYIKSAQ….
NENGKE TE SIKSAQ……
LAEQ SAQ KEPPUSAQ….
NENGKE YE SAA BEBADAQ…..
LAEQ TE PESILAQ…..
NENGKE YE MESILAQ…..

apa dan siapa aku…
inilah bicara dan ucapanku….

LEGAQ WAH TODOQ…. BEBUNGKEM
ALUR WAH MATE MKEQ TE PETIDEM…
LAGUQ YAKIN KENJELO GENE BEGANTI KEKELEM…

apa dan siapapun aku….
inilah bicara dan ungkapanku…

ALUR TE PADE TEDOQ MARAQ DENGAN PAKOQ….
LEGAQ TE KEPUSAQ TIMAQ WAH TE BADAQ….
LAGUQ NDAA PADE LUPAQ…….
LAMUN TEDOQ SAQ LAIN GOGOQ……

AOQ WAH KAH….
SANG MULE ITE PADE WAH JERI DENGAN SAQ TEPOLOQ…..
TERUS PARAN DIRIQTE PADE NAOQ…..
PIAQ KAWULE SANGGUP MEMONGGOQ…..

SIDE PADE SAQ NYIKSAQ….
SIDE PADE SAQ NYUNGSAQ…..
SIDE PADE SAQ TEPESILAQ…..
SIDD PADS SAQ KEPUSAQ…..

ATAWEEEE….
DENGAN SAQ MIAQ PENYIKSAQ….
DENGAN SAQ MIAQ NYUNGSEQ….
DENGAN SAQ MIAQ ITE SALING PESALAQ…..
DENGAN SAQ MIAQ ITE KEPUSAQ…..

JERAQ PADE GIRANG SALING SIKSAQ….
NGKAH PADE DEMEN SALING PESALAQ…..
PENTLAH PADE CEMOH SALING PRIBASAQ….
PEJAOQ PADE SALING PEBAWAQ…..

apa dan siapapun aku
inilah bicara dan ucapanku

 

Puisi Sasak : Ilmu Reseki

Lex mudin selapux cobe
Arax keselit ilmu rahasiye
Ite beriuk boye selak dait selah
Adexn bau gamax idup seke berkah

Ngkah pekodex arti reseki
Sikir jelo kelem piyaxte ngerti
Nenex Kaji Sax Kuase icanin langan
Agen idup ngkah sekedar boyax pangan

Ndex panket ape jabatan sax jari muliye
Lagux bathin sax kuase tipax awak ase
Sai sax pacu boyax ilmu jari sedekah
Duniye akhirat jaxne nikmat semaix molah

Bang Tao Beach Resort
Phuket Thailand 1 Juni 2013

Hazairin R. Junep

Puisi Sasak : Batur ilang

Batur ilang kepuse puse
lex gumin dengan
lamun dateng ujan guntur
atene asex
angene begelamang
ruwen semeton jeri
ngibeng lex julun mate

Batur ilang bilin bale
inax amax kangen bilang jelo
bande mauxne sekedar periri repox
pas ulex anak jari wah belex
pade ilang rase asih

Kepeng mele mex kepeng maux mex
selapux te bilin tais
inax amax jari towax tampe nikmat
cukup mangan nginem

Batur ilang sugul dasan
ilang angen, indengan kabur
sekeli ilang, ilang pisan
mun mate lex mbe kuburne
mun idup lex mbe balene

Bang Tao Beach Resort
Phuket Thailand 1 Juni 2013

Hazairin R. Junep
Glosarium
Kepuse puse : terlunta lunta

Puisi Sasak : Gumi Paerku

Sai epe kemos jerleng
marax mutiare
Gumi paerku
sax jari bantel angen

Sai epe pesisix sax mentereng
marax bidedare
Gumi paerku
sax ku bele mate

Sai epe Rinjani sax bentung
lex awang kelau
Gumi paerku sax ku ponjox
jari makute

Sai epe anak nangis,
besiax, bejorax dait tindox
Gumi paerku
sax ajah aku
lombox buax

Ate,indeng kance impi
galang pedas monyan
senggitan
Gumi paerku
sax tampe tedeng aling
jagax mesax anak bangsen tite

Bang Tao Beach Resort
Phuket Thailand 1 Juni 2013

Hazairin R. Junep

Glosarium

Bidedare/dedare : bidadari
Bentung : bangga
awang kelau : langit kelabu/dalam cobaan
ponjox : junjung
makute : mahkota
jerleng :berkilau
galang : terang
pedas : jelas
monyan : tampak jelas
senggitan : kelihatan
indeng : ingat/pikir