Category Archives: Akademi Sasak

Uras Batur Wah Tengari Sine!.

Hazairin R. Junep

hjunepMoscow (www.sasak.org) Tabex walar, Sanak jari sax soleh dait solah, lamun te pedasang sax aran kebiasaan bangse Sasak olex the zaman laeex jax mule tetu dengan sax rajin mace, ngaji jangke kuliah subuh paye doagne pade dateng. Syaer sax wah ndex arax dengan gemet bace, duntal sax wah te saut sinat six dengan lain, masi bae arax dengan mace dait milu ngerameang.

Tau Nippon sino pade gati kedemane isix tau Sasak sax demen mace. Setingkat kance dengan Amerika dait Eropah sax gemet dait pasu mace buku, dengah ceramah dait nulis. Baturte lex Malesiye wah suwe tadahne milu milu mace buku. Lagux kembexne bangse Sasak sino ndexne arax piyax mane mane sekedix sax aran kemajuan ilmu dait kebudayaan, sanak jari solah?.

Waktu ite kodex girang te lalo moye dengan nyaer, bemonyeh dait bace duntal. Bagus gati meton, yaox mule bagus menoh. Pekare sax mule tetu te gawex ndexne gawex, sengax sax mace tetep tukang mace sax bedengah tetap tukang bedengah. Ngerti ape ndex dengan sax bedengah ino, aro ndex narax sax ngerti apa ape. Sekewale iye pade dateng ngerameyang. Pade six batur lalo ngaji jok mbe mbe, satak taon tetap bae ndex arax perubahan, sengax sax beng pangajian tetep ngeraos dait sax bedengah tetap bedengah.

Apa mauxte ilmu lalo ngaji sekeno sekene, bace syaer to ite dait bukax duntal begulung gulung?. Pire dengan tao mace syaer, pire dengan faham base Kawi dait Arab?. Lagux papah ngakux jari jama’ah paling nomer sekex. Papah ngakux jari rerempung (kelompok) adat atawe masyarakat adat paling julu bedaktar (mendaftar). Sax ngakux keturunan ape jage base Kawi poroxne, sax ngakux TG base Arab langane mangan, sax ngakux Melayu mace syaer bilang bebucu.

Bebadong (modal) bangse Sasak wah luwex gati lamune mele maju marax dengan Amerika atawe Jepang sino, sengax pade demene mace dait lalo ngaji. Karing sopox lampak lamune mele, lagux marax kisap atawe REVOLUSI, yesino, belajah lengan langan sax mbe juax. Gelis entan pade belajah mesax mesax, lalo jok pengajian, engkah pade bedengah doang lagux debat TG dait Kyai, debat Dalang dait dengan sax mace syaer ino, debat keliang adat, debat datu. Artine maeh te pade jari manusia sax perekengan (kritis) sengax lamun te terus muni aox doang, jangke piran te terus pekok telor aneh?.

Lamune masi arax sax beketowan, berembe ntante mulai, nah suruxn, mace cerite tegodek deit tetuntel terus suruxn becerita mesax, lamun ndexman faham suruxn bace dongeng sino 1000 kali. Segerah tau Sasak ndexne menga menga gitak godek dait tertuntel penox lex kantor kantor, peken peken, jangke gawah ye ye dirix jari semerix pondeh dengan luwex.

Nenex Kaji Sax Kuase doang sax paling nenaox.
Marax meno dait maap
Sax ikhlas

Hazairin R. JUNEP