By   March 11, 2011

 

Hazairin R. Junep

Yogyakarta (Sasak.Org)

Rehayu Semeton jari inax amax,

Ngkahte jari menuse berlebihan meton. Kelambi ye cume kelambi. Olex mbe juax kelambi sino ye sekedar penutup awak. Terus kembex ne dengan Sasak mulai genit nyindir dengan lain pekare kelambi. Coba ite pade beriuk pedasang gambar gambar tau Sasak lex taon se ndexman abad 20. Ndexne biza (beda) isix menuse gawah sax belondan ndex wah mandix. Terus ite ngakux akux beduwe kelambi mesax sax te paran adat ino?. Mbe asal usul selapux care bekelambi sax ite beriux tiru lex jelo jelo sine?. Ite ndex inget( sadar) base kelambi sax te kawih sine, sax te jait rapi terus mengkilat bersi te seterikah, ye ndexne budayen tite. Lamun te mele jari dengan Sasak tulen lex pekare kelambi, dung celake jarinte. Belondan separo.

Tahun 1970 lex Lombok masih luwex dengan sax belondan separo. Mbe sax te paran Sasak asli lex FB ine, aneh pade base Sasak ntan. Makat ite luwexan kawih base Bali utawe Jawe?. Sang ite mele jari dengan Bali utawe Jawe jagaxn. Lamun ite doang ndex te cernges (lancar) kadu base Sasak terus ite milu milu marax dengan Bali utawe Jawe, dung ape beden ite dait dengan sax milu milu ntan bekelambi dengan Arab. Dait ndah semeton jari inax amax sax solah dait sholeh, side nane kan bekelambi care Barat sax te jauxang pertame isix dengan Kulande (Nederlands), ape ite ndex ngerase?. Gendang Belex sino ndex ne arax waktu ite kodex. Lamun ite mele beli gendang belex ite musti mesen jok Bali, mbeh jage taoxne te piyax lex Bali. terus dengan Sasak beli gendang belex makat ite ngakux base ite ngepe gendang. Pelecing ite paran dengan Sasak doang buduwe, lex Jawe arax pelecing semeno juax lex Bali. Sai milu lex sai aneh?.

Lamun tetu ite beduwe ilmu kesasakan segerah base Sasak doang ite gawex gawex ntante ngeraos. Komentar ite tulis campuran kadu base Indonesia separoh utawe luwexan six uni Sasak. Kan ite buduwe pepolak (pepatah) sax muni “Base metitox bangse”. Lamun base Sasak ite ndex keruan unin sengax tecampur campur six base lain berarti ite metitox bangse sax bingung, bangse lemah ndex beduwe tandox (identitas). Dengan sax mele te paran bedarax blau six ne kawih base campuran Bali utawe Jawe. Dengan sax mele te paran intelektual six ne kadu base campuran Indonesia luwexan six uni Sasak. Padahel lamun ite tulax jox Sejarah Sasak ndexn arax datu apelagi sax bawaxan sax sebut dirix Lalu ape Raden. Selapux sebutan sino mudian ye te gawex. Selun selun selapux dengan ngerase beduwe hak jari dengan Sasak sax luwih mulia lengan Sasak sax lain. Dengan Sasak sax Asli lengan zaman halal lepang beduwe sebutan Inax, Amax, Semeton, Saix, Adix, Kake, Pisax, Sodet, Naken, Wai, Tuax, Papux, Balox, Toker, Goneng, Papux balox, Toker goneng dait seterusne.

Kembexn ampox ite pade bangse Sasak sine ndot lex taox doang (stagnant), pedahel lengan taon 1970 an wah luwex bajang bajang Sasak sax mbutengang rempung (kelompok) Sasak lex Lombok, Jawe, Bali dait sax lain?. Sengax lamun wah tulak jox masyarakat pade kalah jarin. Sax uwahn ulex pade boyax ilmu jangke sarjane, wahn sax ulex malik ne jari momot. Lex Internet ka luwex kanax Sasak, lamun nulis luar biase semangetne, olex Amerike, Audstralie, Eropah dai seterusne. Demen wah ulex lelah ite boyax ye malik, sixn sebox dirixn. Ape saxne sebox?. Macem macem, lagux sax utame gengsi dait ye ilax. Gengsi sengax ye wah jari intelektual, ngkah bae jangke gerix perbawen isix dengan Sasak sax marax ite sax te paran bongoh sine. Ye ilax sengax timaxne wah jari dengan sax pinter lagux ape baun gawex kadu selametang anak bangsen sax bongoh bongoh ino. Takutn tedatengin isix kanak Sasak sax girang ngendeng ape ape, jari alasan sax lain.

Nane ite beduwe macem macem rempung lex internet, selapux mele pinax mesax mesax. Ye bagus gati lamun seke suwe seke rame semeton Sasak sax berase milu mbutengang watak tau Sasak. Laguxan ngeno luwex rempung te bukax ye ye dirix dengan sax milu. Komentar sax tadah lade dait pesakit ate langsung ite sapu. Anggote sax kritis ndex ite demen apemalik lamun arax batur sax beketoan pekare tau bedarax blau dait adat, ndex te perlu ngantih sejelo, sedetik langsung te ilangang. Jari ite pade sine kumpul jari majuang bangse, ape sekedar milu ngotok pindah leman bough dasan tipax duniye maye?. Bangse Sasak sax solah dait soleh perlu belajah bareng bareng jari menusie sak mule jati. Ape sax ite gitax lex rurung (umum) sekedar bungkus sax aran menusiye. Ngkah te gampang lalox paran dengan lain lengex, sengax selapu kejarian tergantung lex angente mesax. Bagus pengindengte bagus kejarian. Ndexne taox (tempat) atawe keadaan (kondisi) sax piyax ite sengsare lagux pikiran ite mesax. Jari lamun ite terus nunjuk dengan lain kurang utawe lengex kan telu anak imante betunjuk tipak dirikte lamun jempol jax tetep melekux. Jempol sino ite kado sadex tandox bagus, hebat dait selamet. Tunjuk ite nuduh dengan lain lengex telu tunjukte langsung tipax ite, jari inan imente langsung ilax, ye ampoxne melekux. Araxan ite mulai pejonjong imente kadu selapux anak ime lamun bau kadu duwe ime te besalaman kance selapux semetonte sax kadu gamis utawe jubah, sax besewox dait besapux, sax Islam, sax Hindu, sax Kresten, sax Bude, sax pantok gendang Belex, sax begambus,Sax Becilokax, sax Bedangdut dait seterusne. Lengex sopox, lengex selapuxan. Ngkahte jangke jari nile sekecot jari sede susu sepaso.

Marax meno dait ampure

Selamet dait Rehayu!

  • afank

    tyg jak ndk tg care milu”an,
    mbe jak solah lek budaye sasak sik tyg turut tuaq..
    mudahan sak tetep berbudaye sasak semeton” tyg sak lain..
    sasak jaya slalu..!!

  • Ghof rhan

    Sasak…? trus trang be kadang ilaq gati aku ngakuq jari dgn sasak sengaq ndeq ku tao base smeton si teparan base alus.,, angkan mun ne araq dgn ngetoan aku,,dgn embe ante,jawabku dgn lomboq,,sai aran meq,,? Jawabku loq goef.bingung dgn pade sasak,angkan ne araq loq,le,ante,kamu leq desan side ,ongkat smeton lengan praye bketoan,be jawabku ye wah base aku leq desangku ongkatku bbase,
    trus malik smetonte leq ks “le mujitahit amin ” ndeqku taoq ye nine ape mame,sengaq leq gubuq aku ‘le’ tekadu nyebut dgn nine sebagai pihak ketiga,jari kbingungan miaq aku

  • http://sasak.org Kuli panggul

    Memang tetu lalok dsemeton,batur2 tiang laeq kancan sak mngkdex waktu kode sampai blex,waktu pade bareng nuntut ilmu lek bawak treng,aran jak tiang niki dngan dasan uah sak lek dasan repo malik,buk jari batur2 tiang sak tao sekolah nyenke sebrang laut sengak arak biayaye,demen nuah pade selsai ulek muk ngkah akrab malik marak sak uah,ie pade gengsi jari yak bergaul malik.muk lebih2 malik mangkin niki batur sasak pete batur mbe sak kance setare irup,,batur sasak mangkin uah ngkah marak laek,sak dmen saling tulung,demen silaturahmi,kadang2 kance pisak sodet pun ndk saling ktao,napi lagi keluarge sak uah jaok siteparan,.Dait endah penyakit batur sasak ia demen nurut-nurutang.