Mbe taoxkte pade?

Website Instan

Bisamillahirrahamnirrahiiiim….

32 jelo aku bilin gubuk gempengku yax boyax semule jati dirix, sax jari menuse biase, luwexan sax ndexke
taox, seke suwe ku berajah…seke ndarax artin selapux usahe seumur idupku sekedar jax faham, taox dait ceket ngartiang, bedayang dait lakonang ape juax sax ku bace.

Mbe leman ku jax mulai kesah senix semeton jari sax solah ate, sesangkok maye senix penox six wangse Sasak sax tuhu dait ceket lex selapux lelambur. Ape juax sax jax ku seratang lex wacane senix wah jari penaox dengan luwex. Sengax ite manuse ndarax lain yesino ite ngulang pekare sax pade, leman papux balox dait papu bai pade doang, sax lenge, sax solah, sax biase terus ite ulang. Untung De Side Nenex Sax kuwase icanin ite rahmah kelupaan, iye ampoxte bau beriux rerex, atawe beriux nangis. Lex rame atawe lex sepi ndex jari pekare lamun ndex rerex pastine nangis, jari penutukn. Ndex wah arax cerite base sopox menuse momot jangke tutux tungke nyangox, semeno juwax ndarax kejarian dengan nangis jangke tutux, pasti ye tutux isix kebalikan awalne.

Inget kesah Lox Majnun sax ngerok kerepuk kubur lex imen sampix aik matene ngelek marax kokox, bilang kelemax lelaix. Dengan luwex beketowan, ” makat mex nunggalang ngerok kerepuk kubur Majnun?”. ” Aku boyax Layla, sanak…” ongkatne. Dengan luwex benasehat base Layla wah ndexn arax lex to dait ya wah tulak lex ujud mule jatine yesino Roh. Lagux Lox Majnun muni, ” aku boyax Layla lex mbe juwax, mudahan jax ke dait ye lex sopox taox”.

Mule meno sanak sax solah, tipax dengan sax wah tesebut Tuan Guru, boyax Tuhan lex kerepux senuxn, ye paran pegawean merilax ilaxang, lagux usahe senux, metitox ite base dengan sax menu ye beduwe semanget hebat jax beboyax. Sai sai boyax sopox ape juwax kawih semanget belex jaxne dait ape saxne boyax.

Sewulan ku lampax, pelai, taek kerete, trem, bis, perau, dait kapal keber, boyax dait boyax sax mule jati, masi juwax ndexke bedait. Idup marax ibarat bawang, seken ku lokes kulitne, seke dalem aku dait seke ngelex aix matengku. Pire benua, kokox, segare, gunung, gawah aku sugul tamein. Lex ujan, lex panas, lex salju sax nyet gati. Lex lendang sax galuh, lex menange dait otax kokox. Ndexn cukup aik mate, ndexku beduwe ongkat sax pas jax kadu becerite, pekare rahman dait rahim Nenex Kaji Sask Kuwase, ilmu ndexn cukup jax gambarang ruwen gawean De Side Allah SWT.

Ape malik kamera, timax sejuta Giga, ndexn jax sanggup rekam ape sax mele terekam, Arax sopox ongkat sax paling cocok kawih gambarang pengembaranke sax kontex senixn. Yesino, Subhanallahi  alhamdulillah, la Ilahaillallahu, Allahu Akbar….La haulawala kuwwatailla billahilalilaziiim….

Marax meno dait ampure,

Wallahualam bissawab,
Sax ikhlas

Hazairin R. JUNEP

Glossarium:
Ceket = dapat menerapkan
Lelambur = bidang
Nunggalang = berulang-ulang, selalu
Ngerok = mengayak, menyaring
Base = bahwa
Metitox = menunjukkan
SimpleWordPress

LEAVE A REPLY

Please enter your comment!
Please enter your name here