Pedas

Pedasang ape sax jari tema jelo sine, yesino perongkatan sasak sax bilang jelo te kadu, kelompokx ongkat paling kerep te kadu.

Pedas bau teartiang, jelas, terang dait sopox malik sax ndexne pedas dait jarang te sadar base ongkat pedas sino bau teartiang tajem.

Misalne, gambar hasil jepretan lox Wien pedas gati, padahal kameran  ndexne sax mutu undak atas. Artin pedas lex ite yesino; tajem dait terang, ndexn saru atawe blurr.

Lamun meno makat dengan sasak ndexne kene pedas lex masalah pesambelan marax beberox atawe pelecing? Kan pedas endah berarti tajem, rasen sebiye ino kan tajem makat dengan sasak kene lade?

Lade ino berasal olex ongkat lada, sopox macem reragi sax olex saman laex tekenal jari barang niage seduniye.

Dengan sasak saman laex berarti ndexne termasux dengan sax ngaken sebiye, semule jatine. Jari sebiye sino asalne olex Meksiko, baruxne kebut sewahne arax pelayaran antar benoa lex abad 16 an.

Jari ruen jax pertame kali dengan sasak kaken sebiye, langsungne gaetang rasen sax tajem sino lex ragi lain yesino Lada ate lade.

Bandingang misalne kance bagix (asam) dengan sasak langsung beduwe gambaran rasen yesino pedis. Pedis sebenarn asalne pade, yesino pedas alias tajam. Lagux kadu mbedayang arti te gentix ucapan as jari is.

Ongkat sino langsung berubah unin lamun te kadu nggambarang perasaan ate atawe akibat sax jari reaksi lex awax upamen. Pedes matengke kene six kerepuk atawe pedes atengke isix ongkat dengan sino. Pedes lex ite artine tajem sax nyusux. Lamun base indonesiye pedih ongkatne. Arax masi dengan sax muni pereh.

Lamun ite bakat terus arax impeksi upamen pasti serdix gati idapne. Ongkat serdix sino asalne duwe perongkatan yesino ungkpan serrrr…sopox rase sax ngelek lex awak atawe begelore meno dait merix. Ser dait merix jari serdix. Merix sino sebenarne ndexn rase lagux akibat rase. Berembe ruan dengan sax serdix lex muwen? Ye temberingux, sopox ekspresi sax khas base Sasak sax sulit te boyax lex base lain. Yesino dengan kemos lagux pait idapne timax ndexn berarti ye gedeg. Kire kire base indonesiye temberingux bau tepadeyang isix wajah kecut. Nah kecut sino base sasakne pedis…

Marax meno dait ampure
Wallohualam bissawab

Sak ikhlas

Hazairin R. JUNEP

Glossarium:
Blurr : kabur pada gambar
Bagix/bagek : asam
Kene/ngene : bilang, berkata
Kene : kena
Ngelek : mengalir

LEAVE A REPLY

Please enter your comment!
Please enter your name here